Pykasu tyre'ỹmi
Nde reko ñembyasyetéva
Kangyetémi revéva
Che ypýpe reguejy
Ne ñe'ê jepy'apy
Che ñe'ãre ojapokóiva
Ñaimo'ãnte rehenóiva
Rehayhúva ne irûmi
¿Térãpa, pykasumi
Nde py'añemyangekóiva?

Ku oimérõ mombyry
Rejuhágui ñembyasýpe
Nde rejágui tyre'ỹ
Pe iñañáva mborayhu
Anianga rejepoyhu
Che ypýpe rejuhúre
Kunu'û tory pa'ûme
Mborayhu piro'ysã
Ha horýne ne ñe'ã
Roañuãvo mborayhúpe

Hi'ãitépa, pykasu
Oime'ỹrõ rehayhúva
Nde py'ápe reñandúva
Ambue ãngapyhy
Che po'a ko'ê rory
Ajamívo ne rendápe
Ha'e ndéve nde apysápe
Che py'a rekotevê
Tahesãi che rekove
Tahory nde rayhupápe

Nahi'ãinte, pykasu
Tesaráipe che rejávo
Péina che romomorãvo
Ndéve aru che purahéi
Erahami nde pohéi
Eroke nde py'apýpe
Reñandúne nde keguýpe
Mborayhu tuichavaha
Ha eju che reraha
Che mboy'u ne mborayhúpe